Кыргызстанда Ислам өнүктүрүү банкынын колдоосу менен экспорт үчүн адал эт паркын түзүү пландаштырылууда

10-10-2019 16:34

Бүгүн, 10-октябрда Жогорку Кеӊеш жыйынында “2019-жылдын 6-апрелинде Марокконун Марракеш шаарында кол коюлган Кыргыз Республикасы менен Ислам өнүктүрүү банкы жана Жеке секторду өнүктүрүүнүн ислам корпорациясынын ортосундагы “Кыргыз Республикасындагы адал эт паркы” долбоорунун техника-экономикалык негиздемесин даярдоо үчүн техникалык жардам алууга грант берүү жөнүндө макулдашууну ратификациялоо тууралуу” мыйзам долбоору каралды.

Эл аралык иштер, коргоо жана коопсуздук боюнча комитеттин төрагасы Исхак Пирматов 2-окуудагы мыйзам долбоору боюнча баяндама жасады.

Бүгүнкү күндө мал союу жайларын түзүү же иштеп жаткандарын модернизациялоо жана аларды эл аралык стандарттарга шайкеш келтирүү зарылчылыгы бар. Ушул багыттарда Ислам өнүктүрүү банкы менен заманбап адал эт паркын куруу боюнча долбоорго техникалык-экономикалык негиздемени биргеликте иштеп чыгуу жөнүндө макулдашууга жетишилген. Адал стандарты азык-түлүктүн башка түрлөрүнө да жайылтылмакчы.

Талкууда бир катар депутаттар мыйзам долбоорун колдоого алып, өлкө аймагында халал индустрияны өнүктүрүүгө багыт алуу керектигин белгилешти. Ошону менен катар жыйын жүрүшүндө келишимге ылайык, Ислам өнүктүрүү банкы бул багытта 380 миӊ доллар каражат бөлүүгө даяр экени, ал эми кыргыз тарап 50 миӊ доллар салым кошоору белгилүү болду. Бул каражаттар долбоорду изилдөөгө жана логистикалык чыгымдарга багытталат. Долбоордун техникалык-экономикалык негиздемеси иштелип чыккандан кийин адал эт паркы курула турган жер тандалып алынары айтылды.

Ратификациялык мыйзам долбоору 2-окууда добуш берүүгө жиберилди.

Жогорку Кеӊештин Басма сөз кызматы

Көрүүлөрдүн саны : 2677

Окшош жаңылыктар