Чолпонкул Арабаев: “Акылдуу эсептегичтер кыргыз окумуштуулары тарабынан мындан 7-8 жыл мурда эле ойлонуп табылган”

28-09-2016 16:09

Бүгүн, 28-сентябрда Жогорку Кеңеш караган илим чөйрөсүнө тиешелүү мыйзам долбоору биринчи окууда 99 добуш менен кабыл алынды. Республиканын ресурстук мүмкүнчүлүктөрүнө жана заманбап талаптарга жооп берген академиялык илим системасын өнүктүрүү, өлкөнүн илимий техникалык потенциалын калыптандыруу максатында иштелип аталган мыйзам долбоору боюнча ой бөлүшүп, КР Улуттук илимдер академиясынын Президиумунун башкы окумуштуу катчысы, академиянын мүчө-корреспонденти Чолпонкул Арабаев да ушул эле күнү “Парламент” радиосунун түз эфиринде болду.

Илим тармагын өнүктүрүүгө каралган каржылык колдоо мамлекет тарабынан ИДПнын ченеминде алганда 0,88%ды гана түзөт. “Мындай абал  кандайдыр бир олуттуу ачылыштарды жарата салууга толук тирек боло албайт. Ошондуктан, илим тармагын коммерцизациялоо зарыл. Бул деген илимдеги ачылыштарды колдонуу менен киреше табууга жол ачуу дегендик. Аны ири завод-фабрикаларды күтүп олтура бербей, ишкердиктин чөйрөсүнө сунуштаган туура. Себеби, азыркы колдонулуп жаткан электр энергиясы үчүн акылдуу эсептегичтер биздин, кыргыз окумуштуулары тарабынан мындан 7-8 жыл мурда эле ойлонуп табылгандыгын айтышыбыз керек”,- дейт Ч.Арабаев.

Сунушталып жаткан мыйзам долбоорунда мамлекеттик илимий уюмдарда иштеп жаткан илимдин докторлоруна (профессорлорго) жана кандидаттарына эмгек өргүүсүн тиешелүү түрдө 48 жана 36 жумуш күн берилиш керек,- деп  айтылууда. Бул мурда деле болуп келген норма. Аны өзгөртүп коюу туура эмес болуп калмак. Себеби окумуштууларды турак-жай менен камсыздоо суроосу курч турганда жок дегенде эмгек өргүүсү жагынан жетишээрлик эс алуу күндөрүн камсыздоо зарыл,- дейт КР Улуттук илимдер академиясынын Президиумунун башкы окумуштуу катчысы, академиянын мүчө-корреспонденти.

 

 

 

Жогорку Кеңештин Басма сөз кызматы

Көрүүлөрдүн саны : 506

Окшош жаңылыктар