Премьер-министр Мухаммедкалый Абылгазиев: «Биздин башкы милдетибиз калктын турмушун жакшыртуу, анын Өкмөткө карата ишенимин бекемдөө болуп саналат»

12-04-2019 11:01

2018-жыл биз үчүн олуттуу сыноолордун жылы болду. Өкмөттүн дарегине бир топ ачуу сындар айтылды. Бирок биз аны туура кабыл алып, оӊ жыйынтык чыгаруу аракетинде болдук. Анын натыйжасында өлкөдө туруктуулук орноп, экономикалык өсүш камсыз кылынды. Биздин башкы милдетибиз калктыг турмушун жакшыртуу, анын Өкмөткө карата ишенимин бекемдөө болуп саналат. Бул тууралуу Премьер-министр Мухаммедкалый Абылгазиев Жогорку Кеӊештин көпчүлүк коалициясынын жыйынында Өкмөттүн 2018-жылдагы ишинин жыйынтыктары жөнүндө маалымат угулуп жатканда билдирди.

Өкмөт башчы 2018-жылы экономикалык өсүштүн оң көрсөткүчтөрүнүн сакталышы негизги натыйжа болгонун, экономикалык өсүш болжолдуу көрсөткүчтөн 0,7 пайыздык пунктка ашканын белгиледи. “Өткөн жылдын жыйынтыгы боюнча ички дүң продуктунун көлөмү 557,1 млрд сом көлөмүндө болду жана реалдуу өсүш темпи 103,5 пайызды түздү. Ал эми “Кумтөр” кенин эске албаганда, реалдуу өсүш темпи 103,5 пайызды түздү”, - деди ал.

Экономикалык өсүшү 3,5 пайыз деңгээлинде түзүлүп, Кыргызстан ЕАЭБге мүчө мамлекеттердин арасында ИДПнын өсүшү боюнча Армениядан жана Казакстандан кийинки үчүнчү орунга чыкканы, ал эми Россияда ИДП өсүшү 2,3 пайызды, Беларуста 3,0 пайызды, инфляциянын деңгээли 100,5 пайызды түзгөнү белгилүү болду. “Андан тышкары, өткөн жылдагы орточо эмгек акы 235,6 доллар жана пенсиянын жылдык орточо өлчөмү 80,1 доллар өлчөмүндө болду. Бул ЕАЭБ өлкөлөрүнүн арасында эң төмөнкү көрсөткүч болуп эсептелет”, - деп кошумчалады ал.

Белгилей кетсек, Жогорку Кеӊештин көпчүлүк коалициясынын бүгүн, 12-апрелде өтүп жаткан жыйынында КР Өкмөтүнүн 2018-жылдагы иши жөнүндө КР Премьер-министринин отчету угулууда. Жыйынга депутаттар, Премьер-министр Мухаммедкалый Абылгазиев баштаган өкмөт мүчөлөрү, мамлекеттик органдар менен мекемелердин жетекчилери катышып жатат.

 

Жогорку Кеӊештин Басма сөз кызматы

Көрүүлөрдүн саны : 699

Окшош жаңылыктар