Шрифттин өлчөмү:
А-
А
А+
Түстөр:
А
А
А
Сүрөттөр:
Өчүрүү
Кадимки версия

Төрага Талант Мамытов Россиянын Федералдык жыйынынын Федерация кеңешинин Төрайымы Валентина Матвиенко менен жолугушту

29-03-2022
11:43

Бүгүн, 29-мартта Кыргыз Республикасынын Жогорку Кеңешинин Төрагасы Талант Мамытов КМШ ПААнын маарекелик отурумдардын алкагында Алмата шаарында Россия Федерациясынын Федералдык жыйынынын Федерация кеңешинин Төрайымы Валентина Матвиенко менен жолугушту

Жолугушууда эки өлкө ортосундагы саясий-экономикалык, маданий-гуманитардык алакалардын учурдагы абалы жана аны өнүктүрүү маселелери талкууланып, парламенттер аралык кызматташтыкты арттыруу тууралуу да сөз болду.

Алгач мамлекеттер аралык дипломатиялык мамилелердин түзүлгөндүгүнүн 30 жылдыгы менен да куттуктаган Төрага Талант Мамытов: "Кыргызстан Россия менен бардык багыттагы калыптанган тарыхый байланыштарды мындан ары да жигердүү өнүктүрүүгө кызыкдар. Анын ичинен маданий-гуманитардык, билим берүү, соода-экономикалык жана коопсуздукту коргоо жаатындагы алакаларды өнүктүрүү өзгөчө мааниге ээ" - деди.

Байланыштарды чыңдоодо парламенттер аралык кызматташтыктын да ролу жогору экенин айткан Талант Мамытов КМШ ПАА, ЖККУ ПА сыяктуу парламенттик уюмдардын аянчаларында да тыгыз байланышты кеңейтүү зарылчылыгын кошумчалады.

Ошондой эле эки өлкө ортосундагы аба каттамдарына киргизилген чектөөлөрдү алуу тууралуу Россиянын чечимдерин канаттануу менен белгилеген Жогорку Кеңештин Төрагасы унаа жана темир жол каттамдарына да киргизилген чектөөлөрдү алуу маселесин көтөрдү.   

Евразиялык экономикалык биримдик жөнүндөгү келишимде товарлардын, кызмат көрсөтүүлөрдүн, капиталдын жана жумушчу күчтүн эркин жүрүүсү так белгиленгенин айткан Талант Мамытов кыргыз жарандарына карата миграциялык талаптарды жеңилдетүүнү өтүндү. Муну менен катар эки өлкө ортосундагы дипломатиялык мамилелердин 30 жылдыгын, ошондой эле Кыргызстандын ЕАЭБге мүчөлүгүн эске алуу менен кыргыз жарандары үчүн кезектеги “миграциялык амнистияны” өткөрүү мүмкүнчүлүгүн караштырууга чакырды.

Өз кезегинде Россия Федерациясынын Федералдык жыйынынын Федерация кеңешинин Төрайымы Валентина Матвиенко жакында эле өткөн эки тараптуу жолугушуу тууралуу сөз кылып, анда парламенттик кызматташтыкты өнүктүрүүгө тиешелүү бир катар маселелер талкууланганын белгиледи. Айрыкча, анда кыргызстандык студенттерди Россиянын жогорку окуу жайларында бюджеттик негизде окутуу жана эмгек мигранттарын кара тизмеден чыгаруу тууралуу сунуштар айтылганына токтолгон Валентина Матвиенко аталган маселелер Россия өкмөтүнүн кароосуна жөнөтүлгөнүн маалымдады. Бардыгы оң жагына чечилээрине ишеним артаарын билдирип, Россия тарап Кыргызстан менен бардык багыттагы алакаларды арттырууга кызыкдар экендигин кошумчалады.

Муну менен бирге Төрайым эки өлкө ортосундагы дипломатиялык алакалардын түзүлгөндүгүн 30 жылдыгы менен да куттуктады.  

Коомчулук жана ЖМК менен иштөө бөлүмү