ЖАҢЫЛЫКТАР 03.06.21

Жогорку Кеңештин бүгүнкү,  3 – июндагы жыйыны регламенттин 104 – беренесине ылайык, “Ар кандай маселелер” саатынан башталат. “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” конституциялык мыйзамдын  өзгөртүүлөрү  үчүнчү окууга чыгат. “Мамлекеттик жарандык кызмат жана муниципалдык кызмат боюнча кеңештин курамына Кыргыз Республикасынын Жогорку Кеңешинин өкүлдөрүн аныктоо жөнүндө” токтом долбоору да бул жолку жыйындын кароосуна алынат.  “Кыргыз Республикасынын Мамлекеттик бюджеттик резервинен Кыргыз Республикасынын Саламаттык сактоо жана социалдык өнүктүрүү министрлигине кредитордук карызды төлөө үчүн каражат бөлүп берүү жөнүндө” Жогорку Кеңеш токтомунун долбоору талкууланат.

Парламенттин кечээки жыйынында «Бир Бол» саясий партиясынын тизмеси боюнча жаӊыдан депутат болуп келген Нурбек Мурашев ант берип, өзүнүн депутаттык ыйгарым укуктарын аткарууга киришти. 

                             СНХ.Н.МУРАШЕВ

Төрага Талант Мамытов Нурбек Мурашевди жалпы депутаттардын атынан эл өкүлү болушу менен куттуктап, анын мындан аркы ишинде ийгиликтерди каалады.

                              СНХ.Т.МАМЫТОВ

“Мамлекеттик ипотекалык турак-жай насыясы жөнүндөгү” мыйзамга киргизилип жаткан өзгөртүүлөр биринчи окууда кабыл алынды.  Бул багытта демилгечи депутат Аалы Карашев белгилегендей, мыйзам долбоору аркылуу мамлекеттик ипотекалык насыялоонун шарттарына бир топ өзгөртүүлөр киргизилүүдө. Атап айтканда, насыялоонун пайыздык өлчөмүн азайтуу жана баштапкы төлөмүн алып салуу боюнча түзөтүүлөр сунушталууда.

                            СНХ.А.КАРАШЕВ

Турак-жай көйгөйүн чечебиз, - деген жарандарыбыздын басымдуу бөлүгү эмгек мигранты болуп иштөөгө аргасыз болушууда, - деген депутат Умбеталы Кыдыралиев, - эл аралык программалар менен да иштешүү зарылчылыгын карап көрүүгө чакырды.

                           СНХ.У.КЫДЫРАЛИЕВ

                          АБА ЫРАЙЫ ТУУРАЛУУ

Бүгүн, 3 - июнда  Чүй, Талас, Ысык-Көл, Нарын областтарынын кээ бир райондорунда, Ош, Жалал-Абад областтарынын тоо этектеринде жана тоолуу аймактарына өткүн өтүп, күн күркүрөшү, бийик тоолорунда кар жаашы мүмкүн.  Ош, Жалал-Абад областтарынын дыйканчылык аймактарында жана Баткен регионунда күн ачык болот. Батыштан соккон шамалдын ылдамдыгы секундасына 4 – 9, Ысык-Көл, Нарын областтарынын кээ бир райондорунда 15-20 метрге чейин жетет. Абанын температурасы Чүй, Талас:+30…+35; Баткен, Ош, Жалал –Абад: +32…+37 градуска чейин ысыйт. Ысык-Көл, Нарын: +23…+28, бийик тоолуу аймактарда + 8…+13 градус жылуу болот. Бишкек шаарында бүгүн, 3 - июнда жаан-чачын күтүлбөйт. Абанын температурасы + 33…+35 градус ысык болот.